رصاصك خلى ابنى شهيد ..وضيع ضهرى وسندى ..ناهيك عن انه حياتى وعمرى وروحى وكبدى
جرب تبقى مكانى ..جرب تبقى ابوه ! ترجع بيتك تسأل عنه يقولوا لك ناس قتلوه ..امه تقولك ابنى طول عمره فى حاله وعمره فى عمره ما زعل حد
تلمح دمعه فى عينها وترجع تسأل تانى وتالت ..ده كلام بجد ! لحد ما تسمع صوت فى الشارع ..مات الورد
ابنك بقى فى تابوت ..وجسمك يولع رغم البرد ..وتابوته مرفوع بين السما والارض وكل الناس تحت جناحه رايحه تصلى عليه الفرض
وتسأل ابنك مين الجانى ؟ وتسأل ربك قوة وصبر ..تبدأ تسرح فى ابتساماته وطيبة قلبه..وترجع بيتك تلمح ابنه ويبدأ يسأل ...جدو يا جدو بابا راح فين
تقوله تعال وهات اللعبة ..وتنزل دمعة عينك غصب عنك ..تشد حفيدك بين احضانك ..بابا يا عمرى خلاص فى الجنة ..يمسك صورة ابوه ويعيط
مين هيصلى معايا العيد ؟ مين فى الشتا هيدفينى وعلى مدرستى هيودينى ؟؟
جرب كده تبقى مكانى و رد ..على صغير مش لاقى رد !!
الشاعر : وليد الوصيف .