نبي نخبرك يابوي باللي صاير

نبي نخبرك يابوي باللي صاير ،،، أطناب خيمتك صبحوا عمد فبراير.
نبي نخبرك ياقايد ،،، علّي جرى عاره عظيم وشايد.
أطناب خيمتك مسكوا الرواق البايد ،،، مصنفينها الفاتح بحكم الجاير.
هاملين عند الماليين موايد ،،، شاربين كاس الذل دور الداير.
بايعينّك قبضوا عليك فوايد ،،، راهنينك بالرخص للي يعاير.
لاعنينّك كادو عليك مكايد ،،، مكذبينها الثورة مع اللي ثاير.
اللي درتهم صفك نهار الكايد ،،، طلع صفهم يابوي لي فبراير.
مقدمينّك مطعوم للي صايد ،،، جميع ما زرعته في وطاهم باير.
ناكرين ماقالو عليك قصايد ،،، شانيينّك مابان فيك ثماير.
وكل من حسبنا للجروح ضمايد ،،، طلع جرحهم أعظم دفين وغاير .
اللي قبل هتفولك بفكر الرايد ،،، ناكسين هاهم واطيين بعاير.
واقفين ضد اللي عليك ينايد ،،، معاديينا ماتقول كان ضراير.
امسّخين مايستنظفوا بالتايد ،،، ولو كان بتحمّيلهم بالفاير.
حفنة لمد ضمّو على اللمايد ،،، مذاهيب ما هم دالّين شواير.
الا الشعب من جابوا معاك عوايد ،،، ثابتين مارضيوا عليك مغاير.
واضحين ماوقفوش صف محايد ،،، صامدين ما حلْوق عليهم حاير.
على الله نيتك تنصفك وبزايد ،،، وفيهم تبان وما تعقب خاير.
(هيثم الخطاب).