كن والظلام

كن والظلام
إلى الدكتور سيف الإسلام .

ماتشفقش من ظلم السجون.... يجيك النور في وسط الظلام

وكلمة كن آخرها النون.... النون النور ياسيف الإسلام

عض الصبر واكظم بالسنون....وقيم الفرض وانزل عالصيام

ماتخليش في القلب مخزون.... فقدت الخوت يابال الإبهام

فقدت العز والصدر الحنون.... الطير الحر سفاي الأكمام

غالي وغاب لكن مايهون....وهو في القبر نعطوه التمام

وبعد النظر ماهو بالعيون.... وطيب العيش من طيب ليدام

وماتبالغش في حشد الظنون.... بعض الظن فيه أثم وحرام

وشوف بعيد ماتشبح لدون.... ربي راد بإسقاط النظام

خلك خضر ماتغير اللون.... حتى كان قالولك إعدام

اللي مايبيه ربي مايكون.... وكانه راد ماينقص جرام

فلمح البصر ورفيف الجفون....يحيد كفن ويلبس حرام

أسرع من البرق خلاص الديون.... يعيد شريط كاينه أحلام

اللي مالنار يخلق في الجنون.... يرد الروح يجمع في العظام

يجيب عظام لباس الزبون.... ويبني بيت ويدق الرمام

وهو اللي يجيك من عنده العون.... وتاخذ كيل كان عاطي جمام

يعيدلك جاه وأموال وبنون.... يشد الظهر يقشطلك احزام

وقادر كيف ماكون الكون....وجلس عالعرش في سبعة أيام

يسير ريح ويبدل العون.... يحيد أقدام ويثبت أقدام

هللي صار ضحكه عالذقون.... لكن تم ماينفع كلام

وبالتأكيد فيها خاء ونون.... من الخيان وإلا من الأزلام

قليل الأصل والخاين يخون.... مايهماش عيله لا عمام

كمن تيس ماسح بالقرون.... دار عقال داروله مقام

من باريس والدوحه وبون.... والطماع وكلاب الإعلام

من برنار وكلنتن وجون.... تم الوطن مسرح للأجرام

ونحن هلك مانا خانعون.... هلها وين ماصار اللطام

ثمن اشهور وأحنا صامدون.... تحت القصف نظنا من الركام

عطينا أكباد مانا نادمون.... روس تريس من أصعب أرقام

هم سابقون وأحنا لاحقون.... كيف ماقال جيفارا وسام

بركنا بروك مانا حايدون.... حكمنا أهرام وانموتو أهرام

في صدورنا طعون وفي قلوبنا طعون.... وهللي صار ياهلنا أقسام

قطع الروس ماهم الحسون.... رد الثار تملهم غرام

أولاد الأصل للعاهد تصون .... ماكملوش لجواد الكرام

والكردون آخرها النون.... منها نعود ونشد العزام

والزنتان آخرها النون.... انراد الله يعطوك اللجام

والرحمن آخرها النون.... وخلي كن هي مسك الختام

والنون النور ياسيف الإسلام.... وخلي كن هي مسك الختام


وسلامتكم

للشاعر علي الكيلاني


المصدر منتديات القوميون الجدد